Stuðningsfulltrúar gagnrýna norræna velferðarstjórn

Stjórn félags ráðgjafa og stuðningsfulltrúa mótmælir harðlega niðurskurði í heilbrigðisþjónustu og velferðarmálum.

„Samkvæmt nýju fjárlagafrumvarpi ætlar norræna velferðarstjórnin í stórfelldan og sársaukafullan niðurskurð sem mun bitna alvarlega á heilbrigðisþjónustu og velferð, og koma verst niður á byggðum utan höfuðborgarsvæðisins. Í þessum niðurskurði felst líka mikil fækkun starfsfólks við heilbrigðisstofnanir og við velferðarþjónustu. Félag ráðgjafa og stuðningsfulltrúa mótmælir þessari ráðagerð hástöfum!," segir í tilkynningu sem stjórn félagsins hefur sent frá sér.

Þar segir að starfsfólk í heilbrigðis- og velferðarþjónustu sé síst of vel haldið af launum sínum og vandséð hver hagræðingin er í því að borga því í staðinn atvinnuleysisbætur, sem slaga hátt upp í launin. „Í öðru lagi eru skjólstæðingar velferðarþjónustunnar það fólk í landinu sem síst má við niðurskurði, fólkið sem stendur höllustum fæti og getur síst varist. Niðurskurður í velferðarþjónustu þýðir að einhver fjöldi þessara fjölskyldna og einstaklinga færist niður fyrir fátæktarmörk og einhver fjöldi þeirra niður í hungurmörk. Í þriðja lagi ætlar ríkið á sama tíma að verja háum fjárhæðum í málaflokka sem má kalla lúxus, samanborið við það að sjá fólki farborða. Við krefjumst þess að ríkið hætti við niðurskurð í heilbrigðismálum og velferð og forgangsraði fjármunum sínum betur til almennings í landinu," segja stjórnarmenn félags ráðgjafa og stuðningsfulltrúa.