Meintum mannræningjum sleppt úr haldi

Konunum tveimur sem voru handteknar fyrir meinta frelsissviptingu í dag hefur verið sleppt úr haldi lögreglunnar.

Konurnar voru handteknar um klukkan fimm í dag í Hafnarfirði eftir að lögreglunni bárust ábendingar um að þær hefði numið rúmlega tvítuga konu á brott með sér í bifreið.

Konunum er gefið að sök að hafa neytt konuna inn í aftursæti bíls og sett á barnalæsingu þannig að hún komst ekki í burtu. Þær neita þó sakargiftum.

Konurnar neita einnig að hafa gengið í skrokk á fórnarlambi sínu líkt og þær voru ásakaðar um.

Samkvæmt heimildum Vísis saka þær konuna, sem var numinn á brott, um að hafa skemmt bíl annarrar konunnar. Þá vilja þær einnig meina að hún hafi átt í ástarsambandi við kærasta annarrar konunnar.

Málið er í rannsókn hjá lögreglunni á höfuðborgarsvæðinu.