Þeir sem eru flinkir í prófkjöri óttast persónukjör

Formaður allsherjarnefndar Alþingis segir að ekkert standi í vegi fyrir því að frumvarp um persónukjör verði lagt fram á Alþingi í vetur. Hann vísar því á bug að persónukjör dragi úr möguleikum kvenna til að komast á þing.

Frumvarp um persónukjör til sveitarstjórna og Alþingis er ekki að finna á málalista stjórnarinnar fyrir haustþing en málið hefur verið flutt í tvígang.

Fram kom í máli Ögmundar Jónassonar í fréttum Stöðvar tvö í gær að innan þingflokks Vinstri grænna hafi menn áhyggjur af því að persónukjör kunni að draga úr möguleikum kvenna til að komast á þing.

Þessu vísar Róbert Marshall, formaður allsherjarnefndar Alþingis á bug.

Róbert segir að þeir einu sem þurfi að hafa áhyggjur af persónukjöri séu óvinsælir stjórnmálamenn sem eru flinkir í prófkjöri.

„Við höfum séð það í síðustu kosningum að það er mikill vilji til þess hjá kjósendum að breyta röð frambjóðenda á kjördag og það finnst mér að við eigum að koma til móts við," sagði Róbert.

Róbert ætlar sjálfur að beita sér fyrir þessu frumvarpi í vetur.

„Ef það á ekki að leggja það fram af hálfur ráðuneytis þá sé ég ekkert því til fyrirstöðu að það verði flutt sem þingmannamál," sagði Róbert að lokum.