Hægt að kjósa um Icesave frá og með morgundeginum

Atkvæðagreiðsla utan kjörfundar vegna þjóðaratkvæðagreiðslu um Icesave lögin sem Alþingi samþykkti í lok desember og forsetinn neitaði fáeinum dögum síðar að staðfesta hefst á morgun.

Sjálf þjóðaratkvæðagreiðslan fer fram laugardaginn 6. mars. Þingmenn stjórnarflokkanna og Steingrímur J. Sigfússon, fjármálaráðherra, hafa aftur á móti sagt rétt að fresta henni ef ekki verður búið að birta skýrslu rannsóknarnefndar Alþingis um bankahrunið.

Þangað til annað kemur í ljós fer þjóðaratkvæðagreiðslan fram umræddan laugardag. Kjósanda sem ekki getur kosið á kjördag, er heimilt að greiða atkvæði utan kjörfundar frá og með morgundeginum til 6. mars. Hægt er að kjósa hjá öllum sýslumönnum á landinu, á aðalskrifstofum eða í útibúum þeirra. Atkvæðagreiðsla utan kjörfundar á erlendri grundu hefst sama dag á vegum utanríkisráðuneytisins sem mun kynna fyrirkomulag þar að lútandi.