Dorrit hitti Tchenguiz-bróður

„Ég skil það sem svo að hún var ein af þeim fyrstu sem kynntu Tchenguiz-bræðurna fyrir íslenska fjármálakerfinu,“ segir Jonathan Russell, blaðamaður breska dagblaðsins the Daily Telegraph.

Russell fullyrðir í sunnudagsútgáfu Telegraph 7. mars að forsetafrúin, Dorrit Moussaieff, og Vincent Tchenguiz hafi átt í ástarsambandi á níunda áratug síðustu aldar. Vincent er bróðir Roberts Tchenguiz, en á tímum íslensku útrásarinnar fengu þeir hátt í 300 milljarða að láni frá Kaupþingi og hafa gert yfir 400 milljarða skaðabótakröfur í þrotabú bankans.

Fréttablaðið hafði samband við Örnólf Thorsson forsetaritara. Hann sagði að forsetafrúin væri stödd erlendis og gæti því ekki tjáð sig um málið.

Bræðurnir Robert og Vincent Tchenguiz eru íranskir viðskiptamenn, en sá fyrrnefndi sat í stjórn Exista sem átti stóran hlut í Kaupþingi fyrir bankahrunið. Bræðurnir fóru hæst í 78. sæti yfir ríkustu menn Bretlands og voru þeir metnir á 850 milljónir breskra punda. Þeir hafa tapað háum fjárhæðum í kreppunni og í breska blaðinu Observer er Robert Tchenguiz sagður sá kaupsýslumaður í Bretlandi sem hefur tapað mestu á fjármálakeppunni.

Dorrit og Ólafur Ragnar Grímsson forseti kynntust í kvöldverðarboði í London hjá vinkonu Dorritar. Dorrit trúlofaðist Ólafi árið 2000 og þau giftu sig á afmælisdegi forsetans 14. maí 2003.

- afb