Stones í Kringlubíói

Tónleikamyndin Ladies & Gentlemen: The Rolling Stones frá 1974 verður sýnd í endurbættri útgáfu í Kringlubíói í kvöld. Aðeins verður um þessa einu sýningu að ræða.

Myndin var tekin upp á fernum tónleikum á ferðalagi Stones um Bandaríkin 1972 til að fylgja eftir plötunni Exile on Main Street. Myndin verður sýnd í endurhljóðblandaðri háskerpuútgáfu en hún var á sínum tíma tekin upp á 16mm filmu. Hún var síðan stækkuð í 35mm útgáfu áður en hún var sýnd í kvikmyndahúsum. Þar til nú hefur myndin aldrei verið gefin út opinberlega á VHS-spólu eða DVD-diski síðan hún kom út, nema í Ástralíu þar sem hún kom út á VHS í byrjun níunda áratugarins. Undanfarin ár hefur hún eingöngu verið fáanleg í bootleg DVD-útgáfu.

Í myndinni var reynt að líkja sem mest eftir tónleikaupplifun áhorfenda. Fólki í nokkur hundruð manna sal átti að líða eins og það væri á tíu þúsund manna Stones-tónleikum. Til þess var notast við svokallað Quadrasound-hljóðkerfi í stað hins hefðbundna Surround-kerfi.

Hljómsveitin The Rolling Stones var í miklu stuði á þessum tíma, enda nýbúin að gefa út eina af sínum bestu plötum. Exile on Main Street fékk reyndar misjafna dóma þegar hún kom út en hefur í tímans rás verið talin eitt besta verk sveitarinnar, enda var hún endurútgefin fyrr á árinu í viðhafnar­útgáfu. Á meðal þekktra laga sem hljóma í tónleika­myndinni eru Brown Sugar, Midnight Rambler, Tumbling Dice, Street Fighting Man og Jumpin’ Jack Flash. -fb