Flugvallarhlaupari fær 60 daga fangelsi

Héraðsdómur Reykjavíkur dæmdi mótmælendurna Hauks Hilmarsson og Jason Thomas Slade í fangelsi í dag fyrir að hafa hlaupið inn á flugbraut við Flugstöð Leifs Eiríkssonar sumarið 2008. Þeir voru ákærðir fyrir húsbrot og almannahættubrot með því að hafa farið í heimildarleysi inn á flugvallarsvæðið.

Mennirnir hlupu inn á flugbrautina að morgni fimmtudagins 3. júlí 2008 en þá var verið að fara með Kenýamanninn Paul Ramses úr landi. Mál hans hafði vakið mikla athygli en hann var sendur til Ítalíu um stundarsakir. Haukur var dæmdur í 60 daga fangelsi fyrir að hlaupa inn á flugbrautina og Jason í 45 daga en dómur hans er skilorðsbundinn því hann hefur ekki áður gerst sekur um refsilagabrot.

Haukur er sonur Evu Hauksdóttur en bæði voru þau áberandi þátttakendur í búsáhaldabyltingunni. Haukur klifraði til að mynda upp á þak alþingishússins og flaggaði Bónusfána. Hann var fangelsaður í janúar 2009 og reyndi hópur fólks að frelsa hann eftir mótmælafund á Austurvelli þegar fólkið reyndi að brjóta sér leið inn í lögreglustöðina við Hverfisgötu.