Funda með breskum og hollenskum embættismönnum

Það ræðst á næstu dögum hvort Bretar og Hollendingar séu tilbúnir að ganga til nýrra viðræðna um Icesave. Íslenska samninganefndin fundar með breskum og hollenskum embættismönnum í dag.

Eftir því sem fréttastofa kemst næst hélt nefndin af landi brott í morgun en mikil leynd hvílir yfir ferðinni. Fundað verður með breskum og hollenskum embættismönnum í London í Bretlandi í dag.

Eins og fram kom í fréttum Stöðvar tvö í gær er það bandaríkjamaðurinn Lee Buchheit sem leiðir nefndina. Auk hans sitja í nefndinni Guðmundur Árnason, ráðuneytisstjóri fjármálaráðuneytisins, Jóhannes Karl Sveinsson, hæstaréttarlögmaður og Einar Gunnarsson, ráðuneytisstjóri í utanríkisráðuneytinu. Kanadamaðurinn Don Johnston og Lárus Blöndal, hæstaréttarlögmaður, munu sitja samningafundi sem áheyrnarfulltrúar og ráðgjafar. Lárus kom inn í nefndina að kröfu stjórnarandstöðunnar en Lárus hefur haldið uppi harðri gagnrýni á Icesave samkomulagið.

Fulltrúar frá bresku lögmannsstofunni Ashurst og evrópska ráðgjafarfyrirtækinu Hawkpoint munu veita nefndinni fjármálalega og lagalega ráðgjöf.

Fundurinn í dag verður fyrst og fremst upplýsingafundur samkvæmt heimildum fréttastofu. Samninganefndin mun kynna áherslu Íslendinga og samningsramma komi til nýrra viðræðna.

Fundurinn í dag mun ráða úrslitum um það hvort gengið verði til nýrra viðræðna um Icesave. Samkvæmt heimildum fréttastofu mun það skýrast í dag eða á næstu dögum.