Ekki tímabært að spyrja Álftnesinga

Bæjarráð Álftanes ætlar að kanna hug íbúa sveitarfélagsins til sameiningar við önnur sveitarfélög samhliða þjóðaratkvæðagreiðslu um Icvesave.

„Spurningar myndu miða að könnun á vilja Álftnesinga til annars vegar sameiningar við önnur sveitarfélög og hins vegar ef já, þá hvaða sveitarfélags/sveitarfélaga,“ sagði í tillögu meirihlutans.

„Skoðanakönnun vegna hugsanlegrar sameiningar er ekki tímabær,“ bókaði Sigurður Magnússon, fulltrúi minnihluta Á-listans, sem greiddi atkvæði á móti. Sigurður benti á að verið væri að finna lausn á fjárhagsvanda sveitafélagsins og að enn væri óafgreitt erindi Álftaness um leiðréttingu frá Jöfnunarsjóði sveitarfélaga.

„Ef sameiningarmálin koma síðar til athugunar, svo sem vegna þess að ekki næst lausn á fjárhagsvandanum, væri rétt og tímabært að láta fara fram könnun um afstöðu íbúanna,“ sagði Sigurður og benti á Hafnarfjörð, Garðabæ og Reykjavík í þessu samhengi. Engir valkostir hafi verið kynntir fyrir íbúum Álftaness. „Að öðru jöfnu er þó líklegast að sameining við Reykjavík tryggði Álftnesingum besta nærþjónustu, þar sem fjarlægð til Reykjavíkur væru rök fyrir að byggja upp öfluga þjónustu á Álftanesi,“ sagði hann.

Fulltrúar meirihlutans sögðu samning Álftaness við Eftirlitsnefnd með fjármálum sveitarfélaga kveða á um að lausn á fjárhagsvanda Álftaness felist meðal annars í skoðun á sameiningarkostum. - gar