Össur ræðir ESB umsókn við spænskan kollega

Össur Skarphéðinsson utanríkisráðherra ræddi umsókn Íslands að Evrópusambandinu á fundi með Miguel Angel Moratinos utanríkisráðherra Spánar í gærkvöldi, en hann gegnir nú formennsku í ráðherraráði Evrópusambandsins.

Samkvæmt fréttatilkynningu frá Utanríkisráðuneytinu útskýrði Össur stöðuna í Icesave-málinu á fundinum og það samráð sem átt hefði sér stað meðal stjórnmálaflokkanna á Íslandi og samskipti við ráðamenn í Bretlandi og Hollandi.

Þá ræddi Össur um efnahagsáætlun Íslands og Alþjóðagjaldeyrissjóðsins og hvatti til þess að Evrópusambandsríki styddu endurskoðun áætlunarinnar á réttum tíma.

Moratinos mun hafa ítrekað á fundinum fyrri ummæli um að Evrópusambandið liti svo á að umsókn Íslands og Icesave-málið væru tvö aðskilin mál sem ekki ætti að tengja saman.

Össur er nú staddur á Spáni en í gær átti hann fund með David Miliband, utanríkisráðherra Bretlands, í London.