Um 70 björgunarsveitahópar leita Andrésar

Um 70 hópar leitarfólks frá 17 björgunarsveitum leita í dag Andrésar Tómassonar sem saknað hefur verið frá heimili sínu í Reykjavík í rúma viku.

Á föstudag voru leitaðir vegir og slóðar í nágrenni höfuðborgarinnar en sú leit bar engan árangur. Samkvæmt upplýsingum frá Slysavarnafélaginu Landsbjörg verða vegir og slóðar á Reykjanesi og við Borgarfjörð leitaðir auk allra gatna og bryggja á höfuðborgarsvæðinu.

Slysavarnafélagið Landsbjörg hvetur fólk til að athuga vel sitt nærumhverfi, svo sem kjallaratröppur, bílskúra og fleira og láta lögreglu vita ef sést hefur til Andrésar eða bifreiðar hans sem er ljósbrún Suzuki Grand Vitara.