BSRB vill óþvingaða stéttarfélagsaðild

Vegna deilna SFR og Sambands íslenskra sveitarfélaga um stéttarfélagsaðild þeirra starfsmanna sem vinna að málefnum fatlaðra, sem færast nú yfir til sveitarfélaga, vill BSRB ítreka þá afstöðu að starfsmenn geti valið um hvort þeir verði í áfram í SFR eða viðkomandi bæjarstarfsmannafélagi.

Í bréfi sem Elín Björg Jónsdóttir, formaður BSRB, sendi stjórn Sambands íslenskra sveitarfélaga segir:

„Við verkaskiptingu ríkis og sveitarfélaga skal það vera meginregla að það stéttarfélag sem hefur samningsréttinn fyrir þau störf sem um ræðir haldi réttinum til kjarasamningagerðar áfram, ásamt því bæjarstarfsmannafélagi sem er fyrir á þeim vettvangi. Þannig geti starfsmenn valið hvort þeir velji að vera í SFR eða viðkomandi bæjarstarfsmannafélagi með svipuðum hætti og gert var við verkaskiptalögin 1989 og 1990."

Í lögfræðiáliti sem unnið var fyrir BSRB kemur fram að þegar verkefni færðust frá sveitarfélögum til ríkisins, árin 1989 og 1990, var gerð breyting á lögum númer 94/1986 um kjarasamninga opinberra starfsmanna, þess efnis að þeir starfsmenn sem voru félagar í hlutaðeigandi bæjarstarfsmannafélögum og urðu ríkisstarfsmenn, skyldu eiga þess kost að vera áfram í sama stéttarfélagi. Þá var lögfest að nýir starfsmenn, sem réðu sig til ríkisins eftir gildistöku laganna, skyldu eiga val um hvort þeir tilheyrðu bæjarstarfsmannafélagi eða félagi ríkisstarfsmanna.

BSRB telur að nú, þegar verkefni færast frá ríki til sveitarfélaga en ekki öfugt líkt og 1989 og 1990, eigi sömu reglur að gilda um val á stéttarfélagi.