Gera kröfu um að fá að velja sér stéttarfélag

Stjórn Félags ráðgjafa og stuðningsfulltrúa (FRS) mótmælir kröfu Sambands íslenskra sveitarfélaga, um að félagar FRS verði skyldaðir til að ganga í starfsmannafélög sveitarfélaga. Um áramótin mun málaflokkur fatlaðra færast frá ríki til sveitarfélaga, en starfsfólk svæðisskrifstofa málefna fatlaðra vill engu að síður halda aðild sinni að stéttarfélaginu SFR.

Vésteinn Valgarðsson, formaður stjórnar FRS, segir að félagsmenn vilji tilheyra SFR vegna lífeyrissjóðsmála sem og til að missa ekki aðgang að styrktar- og símenntunarsjóðum BSRB. Vésteinn telur einnig að félagafrelsi sé ógnað.

„Við viljum að okkar fólk fái að velja hvort það sé í SFR eða einhverju öðru félagi, eftir atvikum.“ Verði kröfum félagsmanna ekki mætt, mun FRS þrýsta á um lagabreytingu til að geta áfram átt aðild að SFR.

Halldór Halldórsson, formaður stjórnar Sambands sveitar­félaganna, segir að ekki komi til greina að þessi hópur haldi SFR-aðildinni þar sem um sé að ræða félag ríkisstarfsmanna. Aðkoma SFR myndi gjörbreyta samningsumhverfi sveitastjórnarstigsins. „Þar sem við erum sannfærð um að fólk muni njóta sambærilegra réttinda í bæjarstarfsmannafélögunum, þá höfum við ekki áhyggjur af þeim þætti,“ segir Halldór. - þj