Allt fór friðsamlega fram í Héraðsdómi Reykjavíkur

Fyrirtaka í máli níumenninganna, sem ákærðir eru fyrir brot gegn Alþingi, brot gegn valdstjórninni, almannafriði og allsherjarreglu vegna atburða sem áttu sér stað í desember árið 2008, hófst í morgun. Þó nokkuð af fólki var saman kominn í Héraðsdómi Reykjavíkur en þó fékk aðeins hluti hópsins að fara inn í réttarsalinn.

Samkvæmt lögreglu fór allt friðsamlega fram.

Málið var þingfest 21. janúar en ákæran var afturkölluð þegar í ljós kom að þingvörður sem krafðist skaðabóta í málinu er hálfsystir eiginkonu ríkissaksóknara. Ríkissaksóknari taldi sig vegna þess vanhæfan til meðferðar málsins.