Rekstur Landspítalans jákvæður

Rekstrarafgangur Landspítala á fyrstu sex mánuðum ársins 2010 nam rúmum 35 milljónum króna, samkvæmt hálfsársuppgjöri sem Ríkisendurskoðun hefur staðfest. Í byrjun ársins var spítalanum gert að lækka rekstrarkostnaðinn um rúm 9% eða 3400 milljónir króna. Með umfangsmiklum hagræðingaraðgerðum sem gripið var til á öllum sviðum spítalans um áramót hefur tekist að ná þessu markmiði, að því er fram kemur í tilkynningu frá spítlanum.

„Það er ótrúlega góður árangur þegar litið er til þeirra erfiðu aðstæðna sem við höfum staðið frammi fyrir og þurft að takast á við," segir Björn Zoëga, forstjóri Landspítalans. „Það hefur verið erfitt verk og sársaukafullt fyrir marga en með samstilltu átaki gengið furðu vel og án þess að öryggi sjúklinga hafi verið ógnað."