Fær ekki að flytja með fjölskyldu sína heim

Íslenskur maður hefur í tæpt ár reynt að flytjast með konu sína og dóttur til Íslands frá Dóminíska lýðveldinu, en Útlendingastofnun hefur ekki fallist á gögn sem sýna fram á forsjá barnsins.

Skúli Þór Hafsteinsson eignaðist dótturina Liönu Charitte í desember árið 2008, en hún fæddist í Dóminíska lýðveldinu. Í ágúst á síðasta ári giftist hann svo barnsmóður sinni, Önu Jarilyf, en fljótlega eftir það fór Skúli að huga að því að flytja með konu og barn til Íslands.

Það gekk greiðlega að útvega móðurinni dvalarleyfi, en hins vegar hefur Útlendingastofnun ekki enn veitt litlu stúlkunni dvalarleyfi.

Að sögn Skúla hefur stofnunin krafist gagna um forsjá barnsins áður en slíkt leyfi er veitt. Hann hefur lagt fram ýmis gögn, nú síðast yfirlýsingu tveggja votta um forsjána, en hún er stimpluð og undirrituð af dóminískum lögbókanda, saksóknaraembætti og utanríkisráðuneyti. Útlendingastofnun hefur ekki tekið forsjáryfirlýsinguna gilda, en betri gögn munu einfaldlega ekki standa til boða í ríkinu.

Skúli hefur dvalist í Dóminíska lýðveldinu undanfarnar vikur og segist upplifa vanlíðan vegna hinna miklu tafa á málinu, og fjárhagslegt högg vegna þeirra sé einnig mikið.

„Mér líður alveg hræðilega. Það er ekki gott að hugsa til þess á kvöldin að sjá fram á að fara einn heim. Það er skelfileg tilhugsun."

Skúli segir Útlendingastofnun mega skammast sín vegna málsins. Nú huga Skúli og aðstandendur hans að því að útvega Liönu íslenskan ríkisborgararétt svo hún geti flust til landsins sem Íslendingur, en þeim hafði ekki verið bent á þann möguleika fyrr.

Talsmaður Útlendingastofnunar segir í samtali við fréttastofu að stofnunin hafi ekki heimild til að tjá sig um einstök mál. Almennt hvíli sú skylda þó á Útlendingastofnun að tryggja að hafið sé yfir vafa hver fer með forsjá barns áður en því er veitt dvalarleyfi á Íslandi.