Útgjöld fæðingarorlofssjóðs skorin niður um milljarð

Fæðingarorlof styttist og hámarksgreiðslur úr fæðingarorlfossjóði lækka samkvæmt fjárlagafrumvarpi næsta árs. Draga á úr útgjöldum fæðingarorlofssjóðs á næsta ári um einn milljarð króna.

Áformað er að draga úr útgjöldum sjóðsins með aðgerðum sem fela í sér styttingu orlofsréttar, lækkun á hámarksgreiðslum eða lækkun á hlutfalli launa sem notað er við útreikninga á orlofsgreiðslum.

Hins vegar er lagt til að foreldra sem eru utan vinnumarkaðs, eða í minna 25 prósent starfi, fái hærra framlag en nú er greitt út til þeirra.

Guðlaug Einarsdóttir formaður ljósmæðrafélags Íslands segir að nú þegar séu Íslendingar með stysta fæðingarorlof af íbúum Norðurlanda. Styttra fæðingarorlof samræmist engan veginn tilmælum heilbrigðisyfirvalda um brjóstgjöf og umönnun ungbarna. Þar að auki verði yfirvöld að hafa í huga að ef foreldrar eigi að fara fyrr út á vinnumarkaðinn verði að bæta út dagvistunarmálum.

Skerðing á greiðslum úr orlofssjóði er einnig talin geta haft skaðleg áhrif á jafnréttismál. Nýlega greindi fréttastofa Stöðvar 2, frá því að mun færri feður taka nú fæðingarorlof eða eftir að orlofsgreiðslur lækkuðu síðustu áramót.

Sigríður Ingibjörg Ingadóttir, þingmaður Samfylkingarinnar í félags- og tryggingamálaenfd, telur hæpið að hægt sé að skera niður meira á þessu sviði. Hún segir mikilvægt að engar ákvaðanir um framkvæmd á skerðingu séu teknar fyrr en búið er að kanna hvaða áhrif niðurskurður á greiðslum úr fæðingarorlofssjóði hefur haft á þátttöku feðra.