Rekstur borgarinnar á áætlun

Samkvæmt árshlutareikningnum Reykjavíkur er rekstrarniðurstaða A-hluta borgarsjóðs nánast á pari við áætlun, segir í tilkynningu.

A-hlutinn tapaði 88 milljónum króna á fyrstu þremur mánuðum ársins samanborið við 80 milljónir á sama tíma fyrir ári.

Fjárhagsáætlun ársins 2010 gerir ráð fyrir hallalausum rekstri borgarsjóðs en samkvæmt venju gerir fjárhagsáætlunin fyrir fyrri hluta ársins ráð fyrir neikvæðri niðurstöðu, sem leitar jafnvægis þegar líður á árið, segir í tilkynningu.

Rekstrarniðurstaða Aðalsjóðs sem fjármagnar rekstur fagsviðanna um 500 milljónum króna betri en áætlað var.

Handbært fé A-hluta samkvæmt árshlutareikningnum er um 13,3 milljarðar. Eins og Hanna Birna Kristjánsdóttir borgarstjóri hefur greint frá liggur fyrir það mat fjármálaskrifstofu að mikilvægt sé að A-hluti borgarsjóðs hafi aðgengi á árinu að 10-12 milljörðum vegna metinnar markaðsáhættu vegna Orkuveitu Reykjavíkur og því mikilvægt að Reykjavíkurborg viðhaldi sterkri lausafjárstöðu.