Endurreisn á öskusvæðunum hafin

Landgræðslan og Vegagerðin hófu í dag endurreisnina á öskusvæðunum eftir eldgosið með sáningu grasfræs og með aðgerðum til að hemja Svaðbælisá.

Flutningabílar, hlaðnir grasfræi og áburði og einnig með sáningarvél á pallinum, mættu á öskusvæðin í dag en byrjað var á Sólheimasandi meðfram þjóðveginum. Þar plægði traktor fræinu niður í öskublandaðan jarðveginn.

Grasfræið tekur fljótt við sér og spáir Sveinn Runólfsson landgræðslustjóri því að græn slikja verði farin að sjást um mitt sumar. Hann segir að á vegum umhverfisráðuneytis sé nú verið að meta þörf fyrir landgræðslu eftir öskufallið.

Í dag hófust einnig umfangsmiklar aðgerðir við Svaðbælisá en tvö eðjuflóð fylltu svo farveg hennar að hún ógnar nú bæði jörðum í nágrenninu sem og hringveginum.

Farvegur Svaðbælisár verður dýpkaður en einnig verða gerðir nýir og öflugri varnargarðar.