Ríkið frysti öll laun til 2013

Árni Páll Árnason, félags- og tryggingamálaráðherra, segir enga innistæðu vera fyrir kauphækkunum hjá hinu opinbera til ársloka 2013. Hann telur nauðsynlegt að gerð verði þjóðarsátt um að frysta laun. Það sama á við um verðbætur á lífeyrisgreiðslur til lífeyrisþega og aðrar afkomutengdar greiðslur sem ríkið greiðir, svo sem innan búvörusamninga.

Þetta er meðal þess sem kemur fram í grein Árna Páls í Fréttablaðinu í dag. Hann kallar á þjóðarsátt um róttækar aðgerðir í fjármálum ríkisins.

„Kauphækkanir opinberra starfsmanna við núverandi aðstæður kalla einfaldlega á fækkun starfa - það þarf þá að segja upp fólki til að standa undir kauphækkunum til þeirra sem hafa vinnu", skrifar Árni Páll.

Hann segir að þjóðin verði að sameinast um að verja velferðarkerfið; þjónustu við aldraða og fatlaða, barnabætur, vaxtabætur og húsaleigubætur.

Hugsanlega þarf að tryggja þeim sem bera minnst úr býtum og hafa þyngstu framfærslubyrðina stærri hluta af kökunni með nýju barnatryggingakerfi og húsnæðisbótakerfi, að mati Árna. Lyfjakostnað lífeyrisþega þarf að skoða sérstaklega.

Árni Páll segir að ósekju mega skera niður í ýmsum verkefnum í samgöngumálum og fækka starfsliði á vegum utanríkisþjónustunnar erlendis. Hann tekur lokun Þjóðmenningarhússins sem dæmi um verkefni sem ganga megi í þrátt fyrir að sjónarsviptir verði að.

„Allt truflar þetta okkur með einum hætti eða öðrum en enginn líður óbætanlegt tjón", segir Árni Páll en jafnframt að forgangsröðun sem þessi sé óumflýjanleg.

Hann vill ganga hart fram í sparnaði í ríkiskerfinu þar sem það verður ekki til tjóns.

Nefnir hann sérstaklega sameiningu ríkis-stofnana.

„Smákóngaveldi fortíðarinnar verður að heyra sögunni til. [...] Best er að byrja á toppnum. Sameining ráðuneyta og fækkun í yfirstjórn ráðuneyta gefur tóninn í öllu ríkiskerfinu. Fækkun ráðherra og þar með ráðuneyta er forgangsverkefni, enda mikilvægt að ríkisstjórnin gangi á undan með góðu fordæmi og veiti raunverulega leiðsögn."