Segir ráðningu Lúðvíks vanvirðingu við kjósendur

„Þetta er vanvirðing við vilja kjósenda. Það er alveg ljóst," segir Valdimar Svavarsson, oddviti Sjálfstæðisflokksins í Hafnarfirði um ráðningu Lúðvík Geirssonar, bæjarstjóra Hafnarfjarðar, en hann hefur hingað til leitt lista Samfylkingarinnar í bænum. Hann bauð sig hinsvegar fram í sjötta sæti í ár og fékk ekki kosningu og ætti því að öllu jöfnu að detta út úr bæjarstjórn.

Samfylkingin og Vinstri grænir tilkynntu aftur á móti samstarf flokkanna tveggja í gær. Þar kom fram að Lúðvík yrði bæjarstjóri til 2012. Síðan sest Guðrún Ágústa Guðmundsdóttir, oddviti Vinstri grænna, í bæjarstjórastólinn.

„Bæjarstjórinn var í baráttusætinu til þess að láta kjósa um sín störf. Eða maður getur í það minnsta túlkað það þannig en hann lýsti því yfir í tveimur pistlum og frétt á Pressunni.is," segir Valdimar um þá ákvörðun Lúðvíks að sitja í baráttusætinu á lista Samfylkingarinnar.

Valdimar segir það alveg ljóst að kjósendur höfnuðu Samfylkingunni enda missti flokkurinn tvo menn en áður voru þeir með hreinan meirihluta í bænum. Hann segir að það hafi einnig vakið athygli hversu lítil kosningaþátttaka var í bænum eða um 65 prósent.

„Það má ekki gleyma því að það verður mjög stór flokkur til í Hafnarfirði í kosningunum sem heitir auður og er stærri en Vinstri grænir," segir Valdimar um vilja og áfellisdóm kjósenda sem vildu augljóslega eitthvað nýtt að hans mati enda sérstaklega margir sem skiluðu auðum atkvæðaseðlum.

Valdimar segist þó eiga erfitt með að sjá hið nýja í bæjarstjórn Hafnarfjarðar, enda nákvæmlega sama staðan og áður utan oddvita Vinstri grænna sem kemur nú inn í bæjarstjórnina.

Valdimar lýsir því þannig að Samfylkingin hafi strandað og nú sé hún búin að kasta út björgunarbátnum og þeir haldi áfram eins og ekkert hafi í skorist.