Á annað þúsund manns ganga til góðs

Vel á annað þúsund manns hafa skráð sig til þátttöku í landssöfnun Rauða krossins Göngum til góðs. Rauði krossinn bendir fólki á að mæta beint á söfnunarstöðvar, því reynslan sýni að meirihluti sjálfboðaliða skrái sig ekki fyrirfram. Söfnunarstöðvar á höfuðborgarsvæðinu opnuðu kl. 10:00 í morgun og verða opnar fram til kl. 18:00.

Helst vantar sjálfboðaliða í Grafarvogi, Grafarholti, Breiðholti og nýrri hverfi höfuðborgarinnar.

Rauði krossinn hvetur þá sem ekki eru heima þegar sjálfboðaliða ber að garði að hringja í söfnunarsíma Göngum til góðs. Hægt er að hringja í þrjú símanúmer: 904 1000, 904 3000, og 904 500, og þá bætast við 1.000 kr., 3.000 kr. eða 5.000 kr. við næsta símreikning. Símafyrirtækin taka ekkert fyrir símtalið.

Verndari söfnunarinnar, Ólafur Ragnar Grímsson forseti Íslands, opnaði landsöfnunina á Akureyri að þessu sinni. Þaðan fór hann til Dalvíkur þar sem hann mun taka á móti söfnunarbaukum fyrir hönd Rauða krossins þar, áður en hann tekur þátt í hátíðarhöldum vegna opnunar Héðinsfjarðarganga.