Gekk á milli húsa og reyndi að brjótast inn

Lögreglan á höfuðborgarsvæðinu handtók mann um sexleytið í morgun sem var að ganga á milli húsa í austurhluta Reykjavíkur og var að reyna að spenna upp glugga.

Það var nágranni sem tilkynnti um manninn en hann hafði gengið á milli fjölda húsa og reynt að spenna upp glugga, með litlum árangri. Hann var í annarlegu ástandi.

Maðurinn er góðkunningi lögreglunnar og er vistaður í fangageymslu. Samkvæmt upplýsingum frá varðstjóra verður tekin skýrsla af honum síðar í dag.

Samkvæmt upplýsingum frá varðstjóra hjá lögreglunni á höfuðborgarsvæðinu komu 14 tilkynningar í nótt, vegna hávaða í heimahúsum.