Framtíð stjórnarsamstarfsins í óvissu

Framtíð stjórnarsamstarfsins er í óvissu eftir að þrír þingmenn Vinstri grænna sátu hjá við afgreiðslu fjárlagafrumvarpsins í dag, sem var samþykkt með minnstum mögulegum meirihluta á Alþingi. Fjármálaráðherra segir afstöðu þingmannanna vonbrigði og forsætisráðherra segir ekki ljóst hvort hægt sé að treysta á stuðning þremenninganna í framtíðinni.

Það er fáheyrt að stjórnarþingmaður hvað þá hópur stjórnarþingmanna styðji ekki fjárlagafrumvarp ríkisstjórnar hverju sinni. Við upphaf atkvæðagreiðslu um fjárlagafrumvarpið á Alþingi í dag kom í ljós að þrír stjórnarliðar styðja ekki fjárlagafrumvarp ríkisstjórnarinnar.

Lilja Mósesesdóttir segir að hún, Atli Gíslason og Ásmundur Einar Daðason hafi lagt fram tillögur í þingflokki Vinstri grænna um breytta forgangsröðun, tekjuöflun og aukin útgjöld til velferðarmála.

Ásmundur Einar Daðason vildi ekki veita viðtal í dag en fjárframlög til viðræðna við Evrópusambandið eru í yfirlýsingu þremenninganna einnig nefnd sem ástæða til andstöðu við fjárlagafrumvarpið. Atli Gíslason segist ekki geta stutt frumvarp sem boði uppsagnir í opinbera geiranum.

„Ég á mín takmörk. Ég hef greitt atkvæði með stjórnarfrumvörpum sem ég hef verið ósáttur við en þarna var gengið of langt að mínu mati," segir Atli.



Vonbrigði

Fjárlögin voru samþykkt með 32 atkvæðum en 31 sat hjá. Fjármálaráðherra segir mikla vinnu hafa verið lagða í að mæta kröfum um að milda niðurskurð gagnvart velferðarkerfinu.

„Það eru vonbrigði að nokkrir félagar okkar treystu sér ekki til að verða samferða. Það eru mér vonbrigði bæði sem formaður VG og fjármálaráðherra en þau verða að útskýra þetta," segir Steingrímur J. Sigfússon.



Ekki stórmannlegt

Jóhanna Sigurðardóttir, forsætisráðherra, segist ætla að ræða þessa nýju stöðu við fjármálaráðherra. „Nei, það er auðvitað mjög erfitt," segir Jóhanna aðspurð hvort hún geti treyst á stuðning þremenninganna eftir atkvæðagreiðsluna í dag. „Þetta var alls ekki stórmannlegt af þeim." Hún segist gefa lítið fyrir rök þeirra.

Afstaða þremenninganna getur haft veruleg áhrif á stjórnarsamstarfið og jafnvel á líf ríkisstjórnarinnar. Lilja Mósesdóttir gat ekki svarað í dag hvort hún myndi verja ríkisstjórnina falli. Hún sagði það velta á því hvort stjórnin breytti stefnu sinni eða ekki, en Atli Gíslason sagðist myndu verja stjórnina.