Vanessa neitar að hafa átt í ástarsambandi við Eið Smára

Fótboltafrúin Vanessa Perroncell hefur neitað ásökunum um að hafa sofið hjá Eiði Smára Guðjohnsen í blaðinu The London Evening Standard en það var upplýsingafulltrúinn hennar, Max Clifford sem talaði við blaðið.

Götublaðið The Sun heldur því fram í blaði sínu í dag að Eiður Smári hafi átt í ástarsambandi við hina frönsku Vanessu árið 2003. Hún er kærasta Wayne Bridge, sem spilar með Chelsea.

Þá er því einnig haldið fram að hún hafi átt í ástarsambandi við fjóra aðra leikmenn liðsins. Málið komst í hámæli á dögunum þegar greint var frá því að John Terry, liðsmaður Chelsea hefði sofið hjá henni og gert ólétta á meðan hún átti í ástarsambandi við Wayne.

Umfjöllun götublaða í Bretlandi um málið er óvægin. Upplýsingafulltrúi Vanessu segir tilgang frétta The Sun að draga úr trúverðugleika Vanessu. Þá bætir Max Clifford við að hún hafi vísað þessum ásökunum alfarið á bug, fréttirnar séu helber vitleysa.

Sjálfur neitaði Eiður Smári því að hafa átt í ástarsambandi við Vanessu þegar ásakanirnar voru bornar undir hann í The Sun í dag.