Sameiningu Landlæknis og Lýðheilsustöðvar frestað

Sameiningu Landlæknisembættisins og Lýðheilsustöðvar hefur verið frestað um tvo mánuði að minnsta kosti. Til stóð að sameina stofnanirnar 1. janúar næstkomandi og hafa starfsmenn stofnanna tveggja unnið að undirbúningi sameiningar.

Í frétt á vef Landlæknis segir að stjórnarfrumvarp til laga um embætti landlæknis og lýðheilsu hafi verið lagt fram á Alþingi þann 11. nóvember síðastliðinn og hafi verið til umfjöllunar í heilbrigðisnefnd Alþingis. Vegna anna á þinginu hafi ekki tekist að ljúka umræðu um frumvarpið fyrir þinglok þann 18. desember en verði haldið áfram strax á nýju ári.

Stefnt er að því að afgreiða frumvarpið fljótlega á nýju ári og að embætti landlæknis og lýðheilsu taki til starfa ekki seinna en 1. mars næstkomandi.