Þungir dómar í kókaínmálinu

Davíð Garðarsson og Guðlaugur Agnar Guðmundsson fá báðir 4 ára og sex mánaða fangelsisdóm fyrir þátt sinn í kókaínmálinu svokallaða. Sakborningarnir voru allir viðstaddir þegar dómur var kveðinn upp í Héraðsdómi Reykjavíkur nú fyrir skömmu.

Mennirnir fimm sem ákærðir voru í málinu, þeir Davíð Garðarsson, Guðlaugur Agnar Guðmundsson, Jóhannes Mýrdal, Pétur Jökull Jónasson og Orri Freyr Gíslason voru sakaðir um að hafa staðið saman að innflutningi á 1,6 kílói af kókaíni frá Spáni. Efnin voru falin í þremur töskum sem Jóhannes flutti til landsins með farþegaflugi.

Pétur Jökull fékk 3 ára fangelsisdóm og Orri Freyr fékk 3 ára og sex mánaða dóm. Jóhannes Mýrdal fékk 2 ára dóm fyrir sinn þátt í málinu.

Davíð Garðsson lýsti því yfir að hann hyggðist áfrýja dómnum en hinir sakborningar tóku sér frest til að taka ákvörðun um áfrýjun.

Við aðalmeðferð málsins játaði Jóhannes Mýrdal sök. Orra Frey og Guðlaugi Agnari var gefið að sök að hafa lagt á ráðin og fjármagnað innflutninginn. Orri Freyr hafi haft samband við Davíð Garðarsson sem fékk Pétur Jökul til að finna burðardýr. Davíð á einnig að hafa tekið við um þrem milljónum króna í evrum sem hann lét síðar Pétur Jökul fá til að afhenda Jóhannesi. Peningarnir áttu að borga fíkniefnin.

Athygli vakti við aðalmeðferð málsins að þeir Pétur Jökull og Orri Freyr breyttu framburði sínum frá lögregluskýrslum og lögðu áherslu á það að Davíð Garðarsson hefði engan þátt átt í málinu. Spurði saksóknari Davíð hvort hann hefði beitt sakborningana þrýstingi og kom fram í máli hans að hann hefði átt samtöl við sakborningana eftir að einangrun lauk.