Kexinu lokað: Þetta er bara eins og golfklúbbur

„Þetta er bara klúbbur, eins og golfklúbbur," sagði Arnar Már Þórisson, einn af eigendum klúbbsins Kex á Barónstíg en lögreglan lokaði staðnum á þriðjudagskvöldinu.

Í tilkynningu frá lögreglunni kom fram að veitingamaðurinn hefði engin leyfi til veitingareksturs. Gestum var því gert að yfirgefa staðinn og var síðan skellt í lás.

Svo sagði í tilkynningunni að um væri að ræða ítrekuð brot veitingamannsins og yrði nú fylgst með hvort hann reyndi enn að opna staðinn.

Arnar Már er algjörlega ósammála þessu og bendir á að staðurinn sé ekki skemmtistaður.

„Við opnuðum klúbbinn fyrir um tveimur árum síðan þegar billjardstofunni á Hverfisgötunni var lokað. Við keyptum þá tvö billjardborð og komum fyrir. Það eru bara félagar sem hanga þarna," sagði Arnar Már sem bætir við að staðurinn hafi fengið að vera óáreittur þangað til haldið var stórt teiti vegna Airwaves-hátíðarinnar í október.

Arnar viðurkennir að það teiti hafi farið úr böndunum en lögreglan hafði afskipti af staðnum í kjölfarið.

„Ég hef fundað með lögreglunni um þetta en það eru að öllu jöfnu ekki fleiri en tíu, tuttugu manns þarna inni," segir Arnar Már.

Arnar hefur vakið þjóðarathygli undanfarið vegna baráttu sinnar við að halda heimili sínu. Meðal annars fór hann inn í Landsbankann þar sem hann las upp yfirlýsingu. Myndband þess eðlis fór eins og eldur í sinu um veraldarvefinn.

Heimavarnarliðið hefur stutt hann í baráttu sinni. Meðal annars biðu meðlimir varnarliðsins fyrir utan heimili Arnars þegar það átti að bera hann út. Arnar Már er enn þá heima hjá sér og þykir Landsbankinn hafa sýnt óbilgirni í saminingaviðræðum við hann.

Það var svo í síðustu viku sem DV sagði frá því að Arnar Már væri óeðlilega skuldsettur. Meðal annars var húsið hans í eigu félags sem skuldaði hundruð milljóna samkvæmt DV.

„Ég er ekki að biðja um að allar skuldir mínar verði felldar niður. Ég er ábyrgur gjörða minna og fór kannski bratt í því ástandi sem var þá. Ég tek ábyrgð á því. En ef bankinn skiptir um kennitölu á einni nóttu þá hljóta þeir að geta gert við mig leigusamning," segir Arnar Már sem segist hafa keypt húsið fokhelt og gert það upp með sínum eigin höndum.

„Ég var sjálfstæður verktaki, ekki svindlari," segir Arnar Már og bætir við að hann hafi ekki keypt sér hlutabréf eða farið í einhvern forstjóraleik, eins og hann orðar það.

„Ég fór á hverjum degi í vinnugallann og út að vinna," bætir hann við og hvetur fjölmiðla til þess að fara að huga að því að verja heimilin.

Arnar segist ekki hafa verið kærður fyrir að halda úti klúbbnum. Þá segist hann ekki enn hafa fengið nein viðbrögð frá Landsbankanum vegna skuldamála sinna.