Tólf kærur vegna vörslu barnakláms

Tólf kærur vegna vörslu á barnaklámi bárust til lögreglu á fyrstu níu mánuðum ársins. Þetta er svipaður fjöldi og á síðasta ári þegar tíu kærur voru lagðar fram vegna barnakláms fyrir septemberlok. Árið þar á undan var fjöldi kæra hins vegar tæplega helmingi meiri, eða nítján. 

Þetta kemur fram í gögnum sem embætti ríkislögreglustjóra tók saman fyrir Vísi. Samkvæmt upplýsingum frá embættinu er varhugavert að leggja mikla merkingu í fækkun kæra á milli ára vegna þess um hversu fá mál er að ræða. 

Fyrr í dag sagði Vísir frá því að gríðarleg fækkun hefur orðið á kærum vegna nauðgana á börnum frá því á síðasta ári. Á síðasta ári varð nokkur fækkun þegar kemur að kærum vegna annars konar kynferðisofbeldi gegn börnum. 

Friðrik Smári Björgvinsson, yfirmaður rannsóknardeildar lögreglunnar á höfuðborgarsvæðinu, sagðist telja þær tölur gefa vísbendingu um að þróunin væri á þá vegu að brotum hefði í raun fækkað þó erfitt sé að fullyrða um það. 

Bragi Guðbrandsson, forstjóri Barnaverndarstofu tók í sama streng, og telur öflugt forvarnarstarf loks hafa borið árangur.