Umboðsmaður skuldara: Fjölmörgum spurningum ósvarað

Umboðsmaður skuldara, Ásta S. Helgadóttir, telur fjölmörgum spurningum ósvarað eftir gengisdóminn sem féll í dag.

Meðal annars hvort farið verði í endurreiknað uppgjör á þeim lánasamningum sem töldust uppgerðir að fullu þegar Hæstiréttur dæmdi gengistryggingu ólögmæta með tveimur dómum þann 16. júní sl.

Í tilkynningu frá umboðsmanni skuldara kemur fram að hún telji jákvætt að ríkisstjórnin stefni að jafnræði skuldara með löggjöf sem nái til allra gengistengdra bíla- og húsnæðislána, óháð orðalagi lánasamninga.

Þá fagnar umboðsmaður skuldara því að óvissu hafi nú verið létt af þúsundum heimila með þessum fordæmisgefandi dómi um vexti gengistryggðra lána.

Óvissan um vexti þessara lána hefur reynst skuldurum mjög erfið og tafið það mjög að einstaklingar í greiðsluerfiðleikum geti áttað sig á sinni raunverulegu skuldastöðu og endurskipulagt fjármál sín í samræmi við hana.

Tilkynningu frá umboðsmanni skuldara má lesa hér fyrir neðan.