Yfir 3000 manns hafa kosið

Rúmlega 3000 manns höfðu kosið í prófkjöri Sjálfstæðisflokksins í Reykjavík um tvöleytið í dag, samkvæmt upplýsingum frá Sigurbirni Magnússyni, formanni kjörstjórnar.

Sigurbjörn segir að þetta sé svipað og var í prófkjörinu fyrir alþingiskosningarnar árið 2009. Hann segir að miðað við þetta stefni í að fjöldi kjósenda geti farið upp fyrir 7000 manns.

Reiknað er með fyrstu tölum um klukkan hálfsjö í kvöld og ríkir mikil spenna um annað sætið á listanum, en fimm manns gefa kost á sér í það. Hanna Birna Kristjánsdóttir borgarstjóri er hins vegar ein í framboði í fyrsta sætið. Hanna Birna sagði í hádegisfréttum Bylgjunnar að hún teldi að prófkjörið hafi farið mjög vel fram í alla staði. Hún vonaði að út úr því kæmi mjög sterkur listi.