Hanna Birna: Stuðningsyfirlýsing við borgarstjórnarflokkinn

„Ég er mjög þakklát fyrir þann stuðning sem ég fæ í gegnum þetta prófkjör, en ég er sérstaklega ánægð með það hversu sterkur listinn er og hversu vel sjálfstæðismenn hafa valið í þessu prófkjöri," segir Hanna Birna Kristjánsdóttir, borgarstjóri sem er í efsta sæti á lista sjálfstæðismanna eftir prófkjör flokksins í dag.

Hanna Birna segist telja að listinn sé sigurstranglegur. Árangur kvenna sé góður, en þær skipi sex af tíu efstu sætum listans. Þá sé gaman að sjá ný andlit á listanum. „Geir Sveinsson nær þarna mjög góðum árangri og Áslaug Friðriksdóttir er að koma þarna sterk inn auk þess sem Hildur Sverrisdóttir nær mjög góðum árangri," segir Hanna Birna. Hún segir að þetta prófkjör megi einnig túlka sem stuðningsyfirlýsingu við áherslur borgarstjórnarflokksins, því allir borgarfulltrúarnir fái ágæta kosningu þrátt fyri að röð þeirra breytist innbyrðis.

Hann Birna segist ekki telja tímabært að spá fyrir um hversu mörgum mönnum þessi listi geti náð inn í kosningunum í vor. „En ég er þess fullviss að þessi listi eigi góða möguleika," segir Hanna Birna.