Stálu útivistarfatnaði við Geysi

Þjófar brutust inn í ferðamannaverslunina við Geysi í Haukadal á þriðja tímanum aðfaranótt laugardags. Þjófarnir voru þrír og huldu andlit sín að því er fram kemur í tilkynningu. Þeir létu greipar sópa og höfðu á brott með sér talsvert magn af verðmætum útvistarfatnaði. „Þjófarnir létu ekki þar við sitja heldur komu aftur tæpri klukkustund síðar og tóku meira af fatnaði sem að megninu til er frá 66° Norður," segir ennfremur.

Innbrotið uppgötvaðist þegar starfsfólk kom til vinnu á laugardagsmorguninn. Málið er í rannsókn og biður lögreglan alla þá sem veitt geta upplýsingar um mannaferðir á fyrrgreindum tíma við eða á Geysissvæðinu að hafa samband í síma 480 1010.

Þá var tilkynnt um innbrot í fimm sumarbústaði og við Hestvík í Grafningi. „Þjófarnir virðast fyrst og fremst hafa stolið rafmagnstækjum eins og sjónvarpstækjum, hljómflutningstækjum og eldhústækjum," segir lögreglan.

Sófanum stolið - aftur

Í liðinni viku var einnig brotist inn í veiðihús við Hliðarvatn í Selvogi og þaðan stolið nýlegu sófasetti. Þetta er í annað sinn á þessu ári sem brotist er inn í sama hús og sófanum stolið. Búi einhver yfir upplýsingum varðandi þessi innbrot er sá beðinn að hafa samband í síma 480 1010.