Leikskólinn rýmdur á örfáum mínútum

Leikskólinn Urðarhóll var rýmdur snemma í morgun eftir að reykur kom upp í þvottavél og rafmagn sló út. Leikskólastarfsmenn settu af stað viðbragsáætlun og var leikskólinn rýmdur.

Sigrún Hulda Jónsdóttir leikskólastjóri segir að rýming hússins hafi gengið ljómandi vel. „Við vorum ábyggilega um þrjár til fjórar mínútur að rýma hér og koma 96 börnum út úr húsi," segir Sigrún Hulda. Lögregla og slökkvilið hafi síðan komið og gengið úr skugga um að allt væri í lagi.

Sigrún Huld segir að börnin hafi tekið atvikinu með mikilli ró. Eitt barn hafi orðið svolítið skelkað í byrjun en það hafi náð sér fljótlega af því. „Svo var viðræðustund undir hádegi um hvað hafði gerst," segir Sigrún Huld. Aðspurð um það hvort þetta hafi ekki verið viðurkenning fyrir viðbragðskerfi leikskólans segir Sigrún Huld svo vera. „Ég get ekki annað en hrósað öllu því starfsfólki sem hér vinnur," segir Sigrún Huld.