Urgur í læknum

Mikill urgur er í fjölda lækna eftir að stjórn Landspítalans ákvað að breyta vaktarfyrirkomulagi þar. Hjördís Þórey Þorgeirsdóttir, formaður Félags almennra lækna, segir breytinguna geta orðið til þess að vinnan aukist um allt að tuttugu prósent viku.

Í byrjun þessa árs barst meðlimum í félagi almennra lækna bréf frá stjórn Landspítalans þar sem þeim var tilkynnt að breytingar yrðu á vöktum þeirra.

Ekki var þó tilgreint nákvæmlega í hverju breytingarnar fælust. Hjördís óttast að með breytingunni verði lög um hámarks vinnutíma brotin. Sér virðist sem breytingin geti haft það í för með sér að vinnustundum fjölgi mjög en þegar hafi álagið verið mjög mikið.

Í Félagi almennra lækna eru nýlega útskrifaðir læknar sem ekki hafa lokið sérfræðinámi. Hjördís bendir á að það er sá hópur sem oftast á ung börn. Erfitt reynist að sameina krefjandi starf og fjölskyldulíf nú þegar. Sérstaklega óttast hún stöðu ungra mæðra sem vilja starfa við lækningar.

Læknum hefur verið gefin kostur á að mótmæla fyrirhuguðum breytingum til byrjun febrúar. Hjördís telur að það muni meirihluti af meðlimum í félagi almennra lækna sem starfi á landspítalanum gera en það eru um hundrað manns.