Rætt við fleiri en eina ríkisstjórn um að miðla málum

Ríkisstjórnin hefur átt í viðræðum við fleiri en eina ríkisstjórn varðandi milligöngu í að fá Breta og Hollendinga aftur að samningaborðinu um Icesave. Líklegast er að útlendur sáttasemjari komi frá Noregi, verði að nýjum viðræðum.

Miklar þreifingar hafa átt sér stað undanfarna daga milli íslenskra, breskra og hollenskra stjórnvalda um möguleikana á því að aftur verði sest að samningaborði um Icesave. Samkvæmt heimildum fréttastofunnar hefur verið leitað til fleiri en einnrar ríkisstjórnar annarra ríkja í þessum þreifingum, til að reyna að fá Breta og Hollendinga aftur að samningaborðinu. En nýjar viðræður hefjast ekki án samþykkis þeirra. Komi til þess leggja viðsemjendur Íslendinga áherslu á að breið pólitísk samstaða náist um framgang málsins á Íslandi. Að því gefnu að stjórnmálaflokkarnir á Alþingi nái samkomulagi um skipan nýrrar samninganefndar, er gengið út frá því að erlendur sáttasemjari fari fyrir nefndinni.

Þar hafa engin nöfn verið nefnd sem líklegri en önnur, en samkvæmt heimildum fréttastofunnar er talið líklegt að slíkur einstaklingur kæmi frá Noregi. Samstaða yrði að vera meðal þjóðanna um þann einstakling. En Norðmenn hafa áður gerst sáttasemjarar í deilum Íslendinga og Breta í fiskveiðideilum þeirra. Þá hafa Norðmenn reynst Íslendingum skilningsríkir í því ástandi sem nú er, en það gæti aftur dregið úr trúnaði Breta og Hollendinga á norskum sáttasemjara.

Forsætisráðherra sagði eftir ríkisstjórnarfund á þriðjudag að hún vildi fá niðurstöðu á næstu dögum um hvort að nýjum samningaviðræðum gæti orðið. Því má búast við að það liggi fyrir á næstu dögum. Stjórnarandstaðan myndi þá væntanlega hafa eitthvað um það að segja hverjir yrðu skipaðir í nefndina og ef að viðræðum verður eru líkur á að seinni Icesavelögin yrðu felld úr gildi og hætt við þjóðaratkvæðagreiðsluna.