Hugmyndum Íbúahreyfingarinnar í Mosfellsbæ um samstjórn hafnað

Sjálfstæðisflokkurinn í Mosfellsbæ tók ekki vel í hugmyndir Íbúahreyfingarinnar og því strönduðu viðræður um samstjórn í bæjarfélaginu. Þetta fullyrðir Íbúahreyfingin í yfirlýsingu til fjölmiðla.

Í dag sendi kynningafulltrúi Mosfellsbæjar út fréttatilkynningu um áframhaldandi meirihlutasamstarf Sjálfstæðisflokks og Vinstri hreyfingarinnar græns framboðs í Mosfellsbæ. Í tilkynningunni er greint frá hugmyndum meirihlutans um aðkomu minnihlutans að stjórn bæjarins og látið að því liggja að vegna afstöðu Íbúahreyfingarinnar hafi ekki getað orðið af samstarfi.

Í yfirlýsingu Íbúahreyfingarinnar segir að hugmyndir meirihlutans fólust meðal annars í því að öll framboð í bæjarstjórn myndu leggja fram sameiginlega fjárhagsáætlun.

Íbúahreyfingin tók vel í þá hugmynd og lagði til á grundvelli hennar að mynduð yrði samstjórn allra framboða um rekstur bæjarins því fjárhagsáætlun væri í grundvallarplagg hvað varðar stefnumörkun í rekstri sveitarfélagsins. Næðist ekki samstaða um samstjórn lýsti Íbúahreyfingin sig engu að síður jákvæða gagnvart hugmyndum meirihlutans með ákveðnum breytingum.



Ekki var tekið vel í hugmyndir Íbúahreyfingarinnar af hálfu Sjálfstæðisflokksins og því strönduðu viðræður um samvinnu, segir í yfirlýsingunni.