Flugeldasala hefst á morgun

Um átta til níu þúsund sjálfboðaliðar á vegum Slysavarnafélagsins Landsbjargar munu taka þátt í að selja flugelda fyrir þessi áramót en sölustaðir opna á morgun.

„Það er verið að undirbúa allt. Sjálfboðaliðar að taka til og svona," segir Jón Ingi Sigvaldason, markaðs- og sölustjóri hjá Slysavarnafélaginu Landsbjörg. Hann segir að um níutíu björgunarsveitir muni taka þátt í sölu flugelda. Björgunarsveitamenn muni selja sömu vörur og hafa verið í boði undanfarin ár en verði líka með nýja fjölskyldu-/krakkapakka og nýja kökukassa þar sem verði seldar níu litlar skotkökur.

Jón Ingi vill brýna það fyrir foreldrum að börn verði ekki með skotelda nema í umsjón foreldra. „Við seljum ekki börnum undir sextán ára aldri vörur," segir Jón Ingi. Betra sé þá að börn komi í fylgd með fullorðnum til að kaupa vörur.