Hækkunin gríðarlega erfið fyrir garðyrkjubændur

Hækkun á gjaldskrá Orkuveitu Reykjavíkur er gríðarlega erfið fyrir garðyrkjubændur, segir Bjarni Jónsson, framkvæmdastjóri Sambands garðyrkjubænda. Hann segir að kostnaður fyrir garðyrkjubændur vegna hækkunarinnar geti numið milljónum á ársgrundvelli fyrir hvern garðyrkjubónda. Bjarni ætlar að óska eftir fundi með forsvarsmönnum Orkuveitu Reykjavíkur í næstu viku.

Eins og fram kom í frétt í hádegisfréttum Bylgjunnar og hér á Vísi hækkaði Orkuveitan gjaldskrá sína um allt að 40% í gær. Bjarni segist hafa skilning á þeirri erfiðu stöðu sem Orkuveita Reykjavíkur er í, en hækkunin sé gríðarleg. „Það vissu það allir að það var hækkun í farvatninu en þetta var verulega hærra en ég átti von á. Ég var alveg búinn undir 10-20% hækkun en ekki svona rosalega," segir Bjarni.

Bjarni segir að hækkanirnar verði að skoðast í samhengi við aðrar hækkanir sem hafi verið á aðföngum garðyrkjubænda undanfarin ár. Þær hafi ekki enn skilað sér í hærra verði á afurðum frá garðyrkjubændum en á endanum muni þær gera það.