Grípa til aðgerða gegn misnotkun á ritalini

Álfheiður Ingadóttir, heilbrigðisráðherra, hefur skipað vinnuhóp til að skipuleggja aðgerðir til að draga úr ofnotkun og koma í veg fyrir misnotkun á methýlphenídati, sem birtist umfram allt í mikilli notkun á Ritalini og Ritalin Uno, að því er segir á vef heilbrigðisráðuneytisins.

Notkun þessara lyfja hefur vaxið gríðarlega hér á landi á undanförnum árum og er nú tvöfalt til þrefalt meiri en á öðrum Norðurlöndum. Einkum hefur ávísunum til fullorðinna einstaklinga fjölgað og eru þeir nú rúmlega 40% allra sem fá lyfið.

Staðfest hefur verið að einstaklingar sem koma til meðferðar hjá SÁÁ séu í síauknum mæli fíklar á methýlphenídat. Fram kemur á vef ráðuneytisins að sömu þróunar hefur orðið vart hjá fíklum sem leita til bráðamóttöku Landspítala. Yfirlæknir SÁÁ hefur hvatt heilbrigðisráðuneytið til að grípa til aðgerða til að koma í veg fyrir að þessi efni séu seld á götunum og notuð til að sprauta sig með.

Fá tvo mánuði



Landlæknisembættinu og Lyfjastofnun hefur verið falið að grípa strax til aðgerða til að herða eftirlit með ávísunum og takmarka afgreiðslu þessara lyfja við þann hóp sem sannanlega þarf á lyfjunum að halda.

Vinnuhópnum er ætlaður tveggja mánaða tími til að endurskipuleggja alla meðferð lyfjaflokksins, þ.m.t. endurskoðun á klínískum leiðbeiningum og aðrar þær aðgerðir sem hópurinn telur nauðsynlegar. Jafnframt er vinnuhópnum falið að tryggja að þeir sem þurfa á meðferð með þessum lyfjum að halda skaðist ekki, en það eru einkum börn og ungmenni upp að 20 eða 22ja ára aldri.

Skerða ekki aðgengi barna og ungmenna að nauðsynlegum lyfjum

Þá tekur heilbrigðisráðuneytið sérstaklega fram að þessum aðgerðum er ekki ætlað að beinast gegn þeim sem á þessum lyfjum þurfa að halda - sérstaklega börnum og ungmennum. Í því skyni hefur ráðuneytið haft samráð við Geðlæknafélag Íslands og stjórn ADHD-samtakanna, sem leiddi m.a. til þess að ákveðið var að miða við 20 ára aldur. Aðgerðirnar eiga því í engu að skerða aðgengi barna og ungmenna að nauðsynlegum lyfjum, heldur beinast að mögulegri mis- og ofnotkun fullorðinna.