Innlent

„Við vorum ekki fórnarlömb óheillaþróunar“

Andvaraleysi og afneitun einkenndi afstöðu Samfylkingarinnar í ríkisstjórnarsamstarfinu með sjálfstæðismönnum að mati umbótanefndar flokksins. Samfylkingin bað íslensku þjóðina afsökunar í dag á mistökum sem flokkurinn gerði í aðdraganda hrunsins.

Aðalumræðuefnið á flokksstjórnarfundi Samfylkingarinnar í dag var skýrsla umbótanefndar flokksins en nefndinni var gert að fara yfir ábyrgð og starfshætti Samfylkingarinnar í aðdraganda hrunsins.

Í 23 blaðsíðna skýrslu nefndarinnar er flokkurinn harðlega gagnrýndur fyrir andvaraleysi og afneitun í aðdraganda bankahrunsins. Flokkurinn fylgdi ekki eftir eigin stefnu um fagmennsku og ábyrgð í ríkisstjórnarsamstarfinu með Sjálfstæðisflokknum. Ráðherrar hafi þannig beygt sig undir þær venjur sem skapast höfðu á langri valdatíð sjálfstæðisflokksins og gerðu engar tilraunir til að breyta starfsháttum ríkisstjórnarinar. Nefndin telur ennfremur að forysta flokksins sé ekki nægilega miklum tengslum við grasrótina og að innra starfs flokksins sé veikt.

„Það er rétt sem nefndin segir að við vorum ekki fórnarlömb óheillaþróunar á þessu tímabili. Við vorum gerendur sem þátttakendur í ríkisstjórn og meirihlutasamstarfi á Alþingi og þegar litið er í baksýnisspegilinn blasir við að við hefðum getað gert mun betur," sagði Jóhanna Sigurðardóttir, forsætisráðherra og formaður Samfylkingarinnar.

Í ályktun sem flokksstjórn Samfylkingarinnar samþykkti í dag er íslenska þjóðin beðin afsökunar á mistökum flokksins í aðdraganda hrunsins.

„Í þessum flokki gerum við ekki eins og íhaldið þegar það fór í endurskoðun á sínum starfsháttum og innri starfi eftir hruns. Fyrrverandi formaður flokksins kom í ræðustól og hikaði ekki við að tæta og rífa í sig umbótaskýrsluna sem þar var lögð fram og gera lítið úr þeim sem unnu þá umbótaskýrslu," sagði Jóhanna.




Tengdar fréttir

Tillaga um afsökunarbeiðni samþykkt

Flokksstjórn Samfylkingarinnar samþykkti á fundi sínum í dag ályktun þar sem Samfylkingin biður íslensku þjóðina afsökunar á þeim mistökum sem hún ber ábyrgð á í aðdraganda hrunsins. Jafnframt heitir Samfylkingin því að hlusta með opnum hug á gagnrýni og takast á við umbætur á skipulagi, starfsháttum og stefnu flokksins til að koma í veg fyrir að sambærileg mistök endurtaki sig.

Ingibjörg Sólrún á meðal fundarmanna

Ingibjörg Sólrún Gísladóttir, fyrrverandi utanríkisráðherra og formaður Samfylkingarinnar, var meðal fundargesta á flokksstjórnarfundi Samfylkingarinnar sem fer fram á Hótel Loftleiðum í dag. Megin umfjöllunarefni fundarins eru tillögur umbótanefndar flokksins en nefndin var skipuð í aprílmánuði til að fara yfir starfshætti og ábyrgð Samfylkingarinnar í aðdraganda bankahrunsins. Ingibjörg tók ekki til máls á fundinum en hún hefur nú yfirgefið samkunduna.

Stjórnarþátttakan afhjúpar veikleika flokksins

Umbótanefnd Samfylkingarinnar kemst að þeirri megin niðurstöðu í skýrslu sem lögð er fyrir flokksstjórn í dag að bankahrunið og ríkisstjórnarþátttaka flokksins afhjúpi veikleika í flokksstarfinu. Varaformaður flokksins segir að ábyrgðin á bankahruninu megi ekki einskorðast við þá einstaklinga sem stóðu í eldlínunni á tíma hrunsins.

Samfylkingin biðji þjóðina afsökunar

Samfylkingin biður þjóðina afsökunar á þeim mistökum sem hún beri ábyrgð á í aðdraganda hrunsins. Jafnfram heitir flokkurinn því að hlusta með opnum huga á gagnrýni og takast á við umbætur á skipulagi, starfsháttum og stefnu flokksins til að koma í veg fyrir að sambærileg mistök endurtaki sig. Þetta kemur fram í ályktun sem liggur fyrir flokksstjórnarfundi Samfylkingarinnar sem fram fer á hótel Loftleiðum í dag og verður væntanlega samþykkt síðdegis.

Stjórnmálaflokkum verði bannað að auglýsa í sjónvarpi

Samfylkingin hefur brennt sig illa á því að sækjast eftir og þiggja fé af einstökum fyrirtækjum og fjársterkum hagsmunaaðilum. Það er ljóst að flokkurinn hefur gert afdrifarík og alvarleg mistök með því að láta viðgangast að frambjóðendur öfluðu fjár frá fyrirtækjum, og jafnvel hvetja til þess. Þetta er meðal þess sem fram kemur í skýrslu umbótanefndar Samfylkingarinnar og lögð var fyrir flokksstjórn Samfylkingarinnar fyrr í dag. Nefndin leggur til að flokkurinn beiti sér fyrir því að sjónvarps- og útvarpsauglýsingar stjórnmálaflokka verði bannaðar í aðdraganda kosninga.

Ráðherrar sagðir í engum tengslum við flokkinn

„Starf ráðherra er í litlum eða engum tengslum við flokkinn. Ráðherrar Samfylkingarinnar hafa engar skyldur um að standa skil á embættisfærslum sínum gagnvart eigin félögum og flokksmenn hafa engar formlegar leiðir til að koma sjónarmiðum sínum á framfæri við ráðherra flokksins,“ segir í skýrslu umbótanefndar Samfylkingarinnar sem lögð var fyrir flokksstjórn flokksins í hádeginu.

Mest lesið


Fleiri fréttir

Sjá meira


×

Mest lesið