Menningarsjóður Hlaðvarpans úthlutar 14 milljónum

Menningarsjóður Hlaðvarpans veitti á fundi sínum fyrir helgi 19 styrki úr sjóðnum og var alls 14 milljónum úthlutað að þessu sinni. Vel á annað hundrað umsóknir bárust en þær hafa aldrei verið fleiri. Við úthlutun er þess gætt að styrkirnir nýtist sem flestum konum og haft er í huga að sem flest svið menningar njóti stuðnings, að fram kemur í tilkynningu.

Þar segir að árið 1985 hafi hópur kvenna fest kaup á húsum við Vesturgötu 3 í Reykjavík. Húsin hafi verið í nokkurri niðurníðslu. Hópurinn ákvað var að stofna hlutafélag kvenna sem keypti húsin og gekk undir nafninu Hlaðvarpinn.

„Smátt og smátt voru húsin gerð upp og þar blómstraði ýmis konar menningarstarfsemi um árabil. Þar var rekið leikhús, bæði í kjallara og sal, haldinn fjöldi tónleika og funda. Herbergi voru leigð út til félaga og fræðikvenna og þannig mætti áfram telja. Viðgerðir og rekstur voru félaginu þung í skauti og skuldir söfnuðust upp. Þar kom að ákveðið var að hætta rekstrinum og selja húsin. Í samþykktum Hlaðvarpans var kveðið á um að yrði félagið lagt niður skyldi andvirði húsanna varið til að styrkja menningarstarfsemi kvenna," segir í tilkynningunni.

Í framhaldinu var ákveðið að stofna menningarsjóð kvenna og var nú úthlutað úr sjóðnum þriðja árið í röð. „Fjölgun umsókna milli ára sýnir glöggt hve frjó og fjölbreytt menningarstarfsemi kvenna er á Íslandi og að í erfiðu árferði skortir ekki á frumkvæði kvenna."

Stjórn menningarsjóðs Hlaðvarpans skipa:

Drífa Snædal, formaður

Kristín Ástgeirsdóttir, varaformaður

Guðrún Erla Geirsdóttir, gjaldkeri

Ragnhildur Richter, ritari

Þóra Tómasdóttir, meðstjórnandi

Brynhildur G. Flóvenz, varamaður

Hrefna Haraldsdóttir, varamaður