Gagnrýna flutning á málefnum fatlaðra

Ríkisendurskoðun og Öryrkjabandalag Íslands eru sammála um að framkvæmd og skipulag á þjónustu við fatlaða sé í mörgu ábótavant. Ekki liggur fyrir hvort hagkvæmara er að ríki eða sveitarfélög veiti þjónustuna. Formaður Öryrkjabandalagsins segir að félagsmálaráðuneytið hafi ekki unnið vinnuna sína.

Flutningur á málaflokki fatlaðra frá ríki til sveitarfélaga á að fara fram um áramótin. Um er að ræða viðamestu endurskipulagningu á verkaskiptingu ríkis og sveitarfélaga frá flutningi grunnskólanna árið 1996.

Tekjustofnar sem nema rúmum tíu milljörðum flytjast til sveitarfélaganna á næsta ári samhliða yfirfærslu málaflokksins.

Í skýrslu Ríkisendurskoðunar til Alþingis um málefni fatlaðra, sem kom út í ágúst, kemur fram að það skorti heildarstefnu í málaflokknum, ekki sé gert ráð fyrir fjárveitingum í samræmi við mat á þjónustuþörf og meginþættir í starfsemi þjónustuaðila fylgi ekki samræmdum verklagsreglum. Skortur á samanburðarhæfum upplýsingum um þjónustuna valdi einnig því að ekki er unnt að meta hvort hagkvæmara er að ríki eða sveitarfélög veiti hana.

Í nýrri ályktun framkvæmdastjórnar Öryrkjabandalagsins er tekið undir gagnrýni Ríkisendurskoðunar. Guðmundur Magnússon, formaður bandalagsins, segir mikilvægt að allt lagaumhverfi sé tryggt svo yfirfærslan geti farið fram með sóma. „Menn telja að þetta hljóti að vera betra að hafa þetta sem næst neytandanum, en allt er þetta tvíbent," segir Guðmundur og segir að starfsfólk ráðuneytisins hafi ekki staðið sig í stykkinu þegar verið var að meta hagkvæmnina af flutningi málaflokksins frá ríki til sveitarfélaga.