Tveir Íslendingar með CTD

Tveir Íslendingar hafa verið greindir með CTD-sjúkdóminn á Landspítalanum. Þetta eru nánir ættingjar, og eru lausir við öll einkenni, svo sem mikla þreytu og ýmis óþægindi sem sjúkdómnum fylgja. Fólkið hefur fengið meðferð við sjúkdómnum.

Jón Jóhannes Jónsson, yfirlæknir erfða- og sameindadeildar á Landspítalanum, segir að í kjölfar umfjöllunar blaðsins um sjúkdóminn hafi hátt í tvö hundruð manns látið skima sig fyrir sjúkdómnum.

„Það voru fleiri sem gáfu sig fram en engin ástæða var til að rannsaka þá,“ segir hann. Einungis fólk sem er færeyskt í báðar ættir eða með sjúkdómssögu í ættinni eigi að láta skima sig.

Enn hefur enginn Færeyingur verið greindur hér á landi, en sjúkdómurinn herjar mun frekar á Færeyinga en aðrar þjóðir. Þar er nú talið að einn af hverjum 400 sé með sjúkdóminn. Á Íslandi hefur verið talað um að einn sé sýktur af hverjum 10.000 einstaklingum, en það er líklega ofmat, segir Jón Jóhannes.- kóþ