Fengu ekkert að vita um hættu á Arsenikmengun

Fyrrverandi sveitarstjórnarmaður í Ölfusi gagnrýnir að þegar tekin var ákvörðun um Hellisheiðarvirkjun að þeim hafi ekki verið sérstaklega tilkynnt um hættu á arsenikmengun tengdri virkjuninni. Þörf sé á að gæta fyllstu varúðar í slíkum málum þar sem vatn og fiskimið geti skaðast og þar með einar mestu auðlindir landsins.

Fréttastofa greindi frá því fyrir helgi að bændur í nágrenni Hveragerðist óttast að neysluvatn hafi mengast af arsenikki, sem hugsanlega komi frá Hellisheiðarvirkjun. Tvær kýr drápust á bænum í fyrra af ókunnum ástæðum. Ingileif Steinunn Kristjánsdóttir, bóndi á bænum og doktor í landbúnaðarvísindum, lét rannaska sýni úr kú og mjól og sýndu niðurstöður fram á arsenikmengun. Óvíst er um uppruna arseniksins en hana grunar að mengunarvaldurinn sé Hellisheiðarvirkjun.

Séra Baldur Kristjánsson, sat í sveitarstjórn á árunum 2002 til 2006 eða á þeim tíma sem drög voru lögð að Hellisheiðarvirkjun.

Hann fjallar um málið á heimasíðu sinni en þar segir meðal annars að athygli sveitarstjórnarmanna hafi ekki verið vakin á því að arsenik gæti borist upp um holurnar.

Hann segir að einhver hafi þó rekið augun í hugtakið arsenik í flóknum neðanmálsútskýringatexta en að sérfræðingur hafi gengið undir sérfræðings hönd til að sannfæra sveitastjórnina um að eitrið færi það djúpt undir Ölfusið að engin hætta væri fyrir lífríkið hvorki á landi né sjó.

Hann segir sveitarstjórnarmenn vanbúna átökum við sérfræðinga og hagsmunaaðila.