Grunaður um smygl á tugum kílóa af fíkniefnum

Umfangsmikið fíkniefnamál sem nú er til rannsóknar Í Portúgal á rætur sínar að rekja til Íslands. Portúgalskur karlmaður sem búið hefur á Íslandi undanfarin ár var handtekinn í landinu í síðasta mánuði með mikið magn fíkniefna í fórum sínum . Hann var á leið til Íslands þegar hann var handtekinn.

Maðurinn heitir Nuno da Palma. Hann hefur undanfarin ár unnið á veitingahúsum í miðborginni auk þess sem hann hefur verið með eigin rekstur hér á landi sem gekk aðallega út á að útvega íslenskum fyrirtækjum portúgalska verkamenn.

Nuno á marga vini hér á landi en þeir hafa ekki heyrt frá honum síðan í byrjun desember. Einn vinur hans sagði við fréttastofu að það væri líkt og að jörðin hafi gleypt Nuno da Palma.

Ástæðan fyrir því er sú að Nuno var handtekinn á flugvelli í Portúgal með mikið magn fíkniefna í fórum sínum. Þegar hann var handtekinn var Núnó á leiðinni til London en þaðan átti hann flug heim til íslands.

Fréttastofa hefur ekki staðfestar heimildir um magn eða gerð efnanna sem nuno var með í fórum sínum en fjölmiðar syðra segja í fréttum um málið að Nuno hafi verið tekinn ásamt öðrum manni með 31 kíló af kókaíni og sé nú í gæsluvarðhaldi. Jafnframt segir í fréttum að efnin hafi verið ætluð til dreifingar á Íslandi.

Lögregluyfirvöld á Íslandi hafa ekki fengið neina tilkynningu eða fyrirspurn um málið. En samkvæmt heimildum fréttastofu hefur fíkniefnalögreglan hér heima sent kollegum sínum á Portúgal fyrirspurn enda leikur grunur á að fíkniefnunum hafi átt að smygla til íslands. Og að smyglið hafi þar að auki verið fjármagnað hér á landi.