Ekkert ákveðið um stækkun álversins

Ekki er tryggt að ráðist verði í stækkun álversins í Straumsvík, þó það yrði samþykkt í íbúakosningu. Fyrirtækið mun athuga málið komi sú staða upp. Stækkun er enn talinn hagkvæmur kostur, segir Ólafur Teitur Guðnason hjá Rio Tinto Alcan.

Hann segir að tryggja þurfi fjármagn og orku fyrir verkefnið, en slíkt hafi ekkert verið skoðað. Ólafur Teitur ítrekar að frumkvæðið núna komi algjörlega frá íbúum bæjarins. „Við höfðum hug á því [stækkun] en höfum í sjálfu sér ekki tekið neina afstöðu til þess hve vænlegt þetta er núna. Það þyrfti auðvitað að uppfæra þær athuganir sem höfðu farið fram og kostuðu tvo til þrjá milljarða. Ef það lægi fyrir að það væri ekki í andstöðu við vilja bæjarins, en það er það eins og staðan er nú, þá myndum við vilja skoða verkefnið aftur."

Valgerður Halldórsdóttir, formaður Sólar í Straumi, gagnrýnir málsmeðferð bæjaryfirvalda. Enginn hafi haft samband við samtökin, hvorki í kjölfar kosningarinnar 2007 né í aðdraganda nýrrar kosningar nú. Hún hefði talið það eðlilegt að aðilar málsins settust niður og ræddu þætti þess. Hún hafi lesið um það í blöðum að til stæði að fara í nýjar kosningar.

„Þetta er ekki samræmi við yfirlýsingar bæjarstjóra sem sagði fyrir kosningarnar að niðurstaða þeirra yrði látin gilda." Hún segir þó ekkert banna það að fara í nýjar kosningar.

Þá telur Valgerður ekki heppilegt að kjósa samhliða um stækkun álvers og Icesave, en Lúðvík Geirsson bæjarstjóri hefur nefnt það. Bæði málin séu mikilvæg og þarfnist upplýsingagjafar við. Verið sé að gera lítið úr kjósendum með þessu.

Valgerður segir einnig ótímabært að kjósa um málið þar sem engin vissa sé fyrir því að orka eða fjármagn sé tryggt fyrir verkefnið.

kolbeinn@frettabladid.is