Selja unglingum tóbak

Unglingarnir í Hafnarfirði gátu keypt sígarettur i 27% tilfella í september og í 17% tilfella sem börnin reyndu að kaupa neftóbak tókst þeim það.

Forvarnarfulltrúi Hafnarfjarðar stóð fyrir könnun meðal sölustaða tóbaks í Hafnarfirði í lok september. Að þessu sinni var bæði athugað hvort börn gætu keypt neftóbak og sígarettur. Tveir unglingar úr 10. bekk fóru á sölustaði undir eftirliti starfsmanna Hafnarfjarðarbæjar og reyndu að kaupa sígarettur. Sex sölustaðir seldu unglingunum tóbak af 22 mögulegum. Átján sölustaðir selja neftóbak og tókst unglingunum að kaupa neftóbak á þremur sölustöðum. Ekki var farið inn á staði með vínveitingaleyfi þar sem tóbak er selt.

Frekari upplýsingar úr könnuninni eru sendar Heilbrigðiseftirliti Kópavogs- og Hafnarfjarðarsvæðisins þar sem unnið verður úr þeim eins og lög gera ráð fyrir. Sölustöðunum er seldu börnunum tóbak verður einnig send ábending frá forvarnarfulltrúa. Búast má við því að þeir staðir sem seldu börnum tóbak fái áminningu eins og kveður á um í lögum um tóbaksvarnir.