Uppsagnir eru eina leiðin til að hagræða

Fjöldauppsagnir eru fyrirsjáanlegar hjá Orkuveitunni, að mati fyrrverandi forstjóra fyrirtækisins. Laun eru eini hagræðingarkosturinn. Hundrað starfsmenn kosta 650 milljónir en boðaður er niðurskurður upp á tvo milljarða.

„Þessar tillögur sem nú á að grípa til þýða að það þarf væntanlega að segja upp tugum eða hundruðum starfsmanna Orkuveitunnar. Boðuð er tveggja milljarða króna hagræðing á ári á sama tíma og lítið svigrúm er til að spara í öðrum rekstrarkostnaði en launum," segir Hjörleifur B. Kvaran, fyrrverandi forstjóri Orkuveitu Reykjavíkur.

Meðalkostnaður við hvern starfsmann Orkuveitunnar er sex og hálf milljón króna á ári þegar allt er talið. Hundrað starfsmenn kosta fyrirtækið því 650 milljónir á ári. „Á sama tíma er búið að taka gríðarlega til í fyrirtækinu, eða allt frá hruni. Það er nánast búið að snúa öllu við og verið gengið mjög langt. Það er í raun ekkert eftir nema launin," segir Hjörleifur.

Hjörleifur segir að Orkuveitan eigi ekki mikið af eignum en hluti af hagræðingartillögum nú er eignasala. „Það er helst hluturinn í HS veitum sem hefur ekki verið að skila miklum arði. Sá hlutur er metinn á einn og hálfan milljarð. Mér sýnist af fréttum af Reykjanesinu að það sé ekki líklegt til árangurs að bjóða þeim hlutinn til kaups."

Hjörleifur segir að stefna Orkuveitunnar gangi þvert á það sem hann lagði til. „Mér var falið að gera tillögur um að bæta reksturinn. Þær féllu nýjum stjórnarformanni ekki í geð. Ég lagði til hóflegar gjaldskrárhækkanir og að þeim yrði dreift á þrjú ár. Þessar tillögur voru ekki þóknanlegar starfandi stjórnarformanni sem vildi taka þetta í einu stökki og ganga hart fram í uppsögnum. Það sagði hann í samtölum við mig. Þess vegna starfa ég ekki fyrir Orkuveituna lengur."

Hjörleifur segir að það hafi verið sitt mat og framkvæmdastjóra innan OR að þriggja ára áætlunin dygði til að sýna lánardrottnum að verið væri að taka til í rekstrinum. Það væri hægt með því að taka tillit til fyrirtækisins en ekki síður viðskiptavina þess. Aðallega er horft á tvo gjalddaga; á næsta ári og árið 2013. „Ég tel að við höfum haft alla burði til að endursemja um þau lán út frá þeim hagræðingaráformum sem við höfðum og hvernig við ætluðum að auka tekjur."

Hjörleifur segir að ekkert hafi verið horft til gengis krónunnar við mótun hagræðingarhugmyndanna. Ekki hafi verið talið ráðlegt að treysta á styrkingu krónunnar. Hins vegar myndi það skipta sköpum fyrir fyrirtækið ef krónan myndi styrkjast umtalsvert. Aðgerðirnar nú gangi hins vegar þvert á hagsmuni fyrirtækisins í því ljósi.

svavar@frettabladid.is