Útilokar ekki frekari hækkanir

Haraldur Flosi Tryggvason, stjórnarformaður OR, útilokar ekki að til frekari gjaldskrárhækkana komi að ári. Í samtali við Heimi Má Pétursson í kvöldfréttum Stöðvar 2 sagði hann ekki víst að þessi hækkun dyggði til að rétta kútinn hjá Orkuveitunni, stjórnendum fyrirtækisins hefði verið gefin heimild til að taka frekari ákvarðanir um gjaldskrárhækkanir tvisvar á ári með hliðsjón af hækkun neysluvísitölu.

Heildarskuldir Orkuveitunnar nema í dag um 240 milljörðum sem samsvarar um helmingi af fjárlögum íslenska ríksisins. Ef ekki hefði komið til neinna gjaldskrárhækkana hefði Orkuveitan aðeins átt fyrir um 90% af afborgunum skulda á þessu ári, 65% á næsta ári og einungis 44% árið 2013.

Á undanförnum árum hefur orkuveitan greitt milljarða í arðgreiðslur til eigenda sinna, sem að mestu hafa farið til stærsta eigandans - Reykjavíkurborgar, og námu greiðslurnar átta hundruð milljónum á þessu ári. En það voru með lægstu arðgreiðslum sem Orkuveitan hefur greitt til borgarinnar. Haraldur Flosi segir að stjórn Orkuveitunnar hafi samþykkt að ganga til viðræðna við eigendur hennar um að arðgreiðslur verði felldar niður tímabundnar.

Í viðtalinu kom einnig fram að gripið verður til róttækra sparnaðaraðgera innan Orkuveitunnar og sagðist Haraldur sjá fram á uppsagnir starfsmanna.